මීට මාසයකට පමණ ඉහත දී, තැපෑලෙන් මාවෙත පැමිණියේ අපූරු ආරාධනාවකි. එහි වූ නිර්මාණශීලිත්වය සේම අන්තර්ගතය දුටු විට, එහි යා යුතුම බැව් හැඟුණි. ආරාධනය පොත් පිස්සන්ගෙනි, මාත් පිස්සෙකි.
මේ අමුතුම වැඩකි. මෙතෙක් නොවුණු දෙයකි. ජ්‍යෙෂ්ඨ, කණිෂ්ඨ ලේඛක ලේඛිකාවන් හා පාඨකයන් එකිනෙකා හමුවන අපූරු බිමක් ඔවුන් තනා තිබුණි. ඒ මහවැලි කේන්ද්‍රයේ ය.
ගිය විගස ලැබුණේ ආදරණීය පිළිගැනීමකි. ඔවුන් දුන් පොතෙහි දවසේ පෙළගැස්ම විය, දහවල් 2.30 එහි අවසානය බව දුටු විටම මෙතරම් වේලාවක් මෙහි කෙසේ නම් ඉන්න දැයි සිතුන මුත් ඒ සිතුවිල්ල වලංගු වූයේ ස්වල්ප වේලාවකට පමණි.
පූජ්‍ය බටුවන්ගල රාහුල හිමියන්ගේ නූතන නවකතාව පිළිබඳ දේශනය කෙටි නමුත් රසවත් සේම, නොදත් බොහෝ දෑ, පිළිබඳ දැනුවත් වන්නට අවස්ථාවක් විය.
මගේ ලේඛන දිවියට විටෙක ගුරුවරයෙක් සහෝදරයෙක් සේ, දිරි දුන් නිබඳ ගුරු හරුකම් ලබා දෙන වෛද්‍ය සුසිත රුවන් මහතාගේ දේශනයත් එවැනිමය.
සහන් කසීර අයියගේ තීරු ලිපි හා ෆේස් බුක්, දිනපතා කියවන ඔහුගේ ෆේස් බුක් ලිපි සේම තදින් හදවත ස්පර්ශ කෙරූවකි. දිලීප ජයකොඩි මහතාගේ නූතන ඉන්දියානු සාහිත්‍ය පිළිබඳ දේශනයද, කත්‍යානා මහත්මිය ගේත්, බෙනඩික් මහතාගේත් කාංචනා අක්කගේත් දේශන අවසානය දක්වාම එහි මා රදවා ගැනීමට හේතු වුණි.
අවසානයේ මේ මසුරන් අවස්ථාව නිර්මාණය කල, මෙතෙක් නොදුටු මිතුරෙකුව සිටි ඉසුරු අයියටත්, දෙවරක්ම ආකර්ෂණීය කවර නිර්මාණය කර දෙමින් මගේ නිර්මාණ වලට යෝධ ශක්තියක් වන ප්‍රශාන් අයියටත්, අමිල අයියා, කවීෂ, ධනුෂ්ක, ජනනි, රසංගි, ඔසදිනි, සචිතා සියල්ලන්ට ආගන්තුක සත්කාර, තිලිණ මේ සියල්ල වෙනුවෙන් තුති පුදමි.
සාහිත්‍ය ලෝකය වෙනුවෙන් හෙට තවත් වැඩදායක යමක් කරන්නට ශක්තිය ධෛර්යය ලැබේවා.
No comments:
Post a Comment